好多朋友都對此有疑問：「點樣去清洗球衣先最好？」因為都有唔少案例清洗後甩號碼/甩贊助，又有D比工人姐姐洗爛咗件衫🙈……….

⭐️ 1. 先講講清洗方法：

「手洗」：講咗100次都係咁講，球衣絕對建議用手洗。呢個方法最能夠避免對球衣物料/印字logo造成損傷。

手洗既意思：浸落水中一段短既時間，輕力按壓。

「落機洗」：都有客人會將球衣放入洗衣機，小篇絕對唔建議 (除非球衣係用黎粗著踢波用)

因為洗衣機會將衣物不斷高速攪拌，有機會對球衣造成較大損傷。(如果有人攞住你地D珍藏波衫，耍雜技咁係空中不斷fake，你地都驚啦🥲。)

當然都會有人「反轉件衫+獨立入洗衣袋」，然後先放入洗衣機。但以上呢兩個步驟，其實只係用於「分隔球衣與其他衣物接觸」，「避免球衣正面與其他衣物磨擦」。但依然避免唔到高速攪拌。

E.g. 舉個簡單例子大家就會明：「反轉件衫入洗衣袋，即係球衣正背面痴埋。咁如果件衫正面有刺繡logo，背面有膠印字，變相洗衣機攪拌時反而會加劇兩面logo既磨擦。」

每件衫都唔同，有D衫洗成世都唔會爛，有D衫則比較脆弱，建議用最穩陣既方法。

⭐️ 2. 清洗物料

除非有好大污跡/汗漬，否則都係建議用清水洗。

「洗衣液/洗衣粉」等等，就視乎個人需要。但首先你地要「好清楚」每一種洗衣液，對唔同物料既球衣，印字，會否有影響。

可能有D洗衣液，對金色既logo會有化學反應。亦都可能有D洗衣液會加劇對紅色棉質球衣既染色情況………………..

始終大家都係愛衫之人，每一件球衣都係珍藏。(唔同球員本人，佢地用嚟落場，著完攞去漂白都得)。

⭐️ 3. 清洗後乾衣

清洗後處理「同樣重要」。建議掛係度等件衫滴水自然乾，盡量唔好刻意去扭乾件衫，因為有機會扭到D logo。

另外有一樣「好少人會注意」。洗完等待乾衣既過程中，有時會有一D小水點殘留係膠質印字logo表面上，隨着時間會乾左係表面上，形成一點點小水印。

所以掛乾時可用紙巾/毛巾先印乾係膠logo上既水點，其餘球衣上既布料就等佢自然乾。

🙏🙏謝謝觀看，每個人對球衣既保養方式都有所不同，最緊要搵到一個最合適既方法🙏🙏